Intant dai 377 agns de ocupazion dal Friûl de bande de Serenissime, unevore a son stadis lis vueris piçulis e grandis che la regjon e à scugnût sapuartâ, ma, forsit, une sole e jé stade che combatude dai furlans pe lor libertât: che dal 1420 par inderedâ l'ocupazion dal Friul dal esercit de republiche. Dutis chês altris a son stadis vueris, invasions, batais e scorsadis che Vignesie e à combatût su cheste tiare cuintri l'Austrie, i Ongjarês, i Turcs i Uscocs e altris predons par colâ infin, e il Friûl cun jé, sot i colps des armadis napoleonichis. Sichè il Friul al jere tè piês pusizion, chê di sei condanât a patî, a sei fiscât, slambrât e violentât ripetudìs voltis di ogni contendent ch'al passave di chestis bandis. E il popul al jere obleât a tasé, lavora e magari ancje combati par int foreste sence podé vê ideai o interes di difindi, sperant dome di salvâ la vite. Za tai prins agns dopo rivade Vignesie, il Friul al veve viodût passâ pes sôs stradis esercits austriacs e ongjarês clamats dal patriarcje dì Aquilee a combati cuintri l' esercit venezian, stant che il prìncip gleseastic nol voleve rassegnâsi a sei dispodestat dal podê temporâl. Po, dal 1477 al 1499, lis invasions dai Turcs. E tal cont dal secul a van zontadis ancje lis tassis in bêçs e materiâl (palis, picons, lamis par armaduris e soredut troncs pal arsenâl) che lis comunitâts dal Friûl a jerin obleadis a paiâ ae republiche di S.Marc.
          Ma o crodìn di no sbaliâ afermant che un dai piês secui che il popul furlan al à scugnût sapuartâ sot la Serenissime al sedi stât il Cincent. Prindidut pe sorde e continuade lote che di simpri e meteve cuintri Vignesie e l'Austrie, par vie che ducjedoi i contendents a vevin come obietîf la pârt di Friûl di chelaltri. Une lote fate no dome di vueris, ma ancje di falsitâts, di asse, di imboscàdis e des plui impensadis tristeriis. Po il malandrêt maçalici de joibe grasse dal 1511 cu la sô gjile di svindics (tra i Savorgnàns venezians cuintri i Torians sostignûts dal imperi) durade scuasi cincuant'agns, come che o vin za ricuardât. A chest si è zontat il taramot dal març dal 1511 ch'al à sdrumât ancje il cjiscjel di Udin e la peste sclopade subite dopo ch'e a copât nufmil personis.
          Il Sîscent, secul che al à come riferiment chestis notis, nol è stât puntinât di tantis vueris e disgraciis come il precedent, ma instès no si pò fevelâ di pâs ni di serenitât, stant che il popui furlan al pative l'opression dai nemis di simpri: la miserie e l' ignorance, dôs cundizions voludis e perpetuadis dai nobilots locâi e dai gnûfs borghês che a paronavin su la puare int.

          II gnûuf secul si jere viart cu lis incursions che i Uscocs, a partî dal 1599, a vevin organizât cuintri la cueste istriane cun imburidis azions corsaris, sei sul mâr che su la tiare interne. I Uscocs a jerin ribêi slâfs e ongjarês che dal 1526, dopo l'ocupazion dai lôr teritôris operade dal esercit Turc di Soliman il Magnific, si jerin organizâts in bandis armadis e a vevin scomençat cun atacs di sorprese cuintri i Turcs stès, rivant al improvîs, robant e rapinant dut ce che a podevin. Lu fasevin par sorevivi e a vevin la protezion austriache stant che a combatevin cuintri i Turcs che, dopo la concuiste dal teritôri balcanic e de Ongjarie, a jerin rivâts fin su la puarte de catoliche Austrie.
          Ancje cuintri i teritôris venezians su la cueste istriane fin dal 1550 i Uscocs a vevin tacât a fâ violentis scorsadis. A rivavin a tradiment, a rapinavin, a brusavin e pò a scjampavin su lis lor lizeris barcjis a grande velocitât. Par une di chestis incursions fate tal teritôri venezian di Monfalcon e stufe des angariis patidis dilunc il timp, ma soredut cui segret desideri di riconcuistâ la fuartece di Gardiscje, piardude irmò dal 1521, viars la fin dal 1615 la Serenissime e decidè di movi il so esercit cuintri l'Austrie. Il provioditôr di Palme, Pompeo Justinian, al ordenà la mobilitazion des trupis regolârs e des cernidis furlanis e al avanzà di Palme viars Gardiscje, rivant a ocupà Cormons, Marian, Romans, Migee, Sagrât, Vilès, Aquilee e daspò ancje Lucinîs e Gurize. A parti dal fevrar dal an dopo la fuartece di Gardiscje e fo assediade dai venezians cun tun grant numar di soldats a pît, cavalirs e canons. A fasèrin di dut par creâ un varc tè fuartece, ma al fo inutil stant che i difensôrs si batevin cun ardiment. L'esercit di Vignesie, invecit, al lassà sul teren cirche cuatrimîl muarts, e cuanche il senât de republiche al vignì a savêlu, al resta impressionât e al ordenà la fin dal assedi. Ma la vuere no finì. E continuà acanide e insanganade cun scorsadis e imboscadis di une bande e di chealtre, e no dome intôr di Gardiscje o Palme, ma ancje te Valcjanâl, tal cividalês, tal gurizan. Lis azions a jerin improvisis e a vevin soredùt che di taiâ il riforniment di vivars e munizions e di sflancâ l' aversari.
          Intant si jere rivâts tal novembar dal 1617 e inmò une volte la citadele di Gardiscje e fo assediade, e seancje difindude di valorôs combatents., e stave par cedi par mancjance di aghe, vivars e munizions. Ma propit in chei dis, par intervent de Spagne e de France, al vignive firmât un armistizi tra lis dôs parts. In fuarce di chest document l'Austrie e Vignesie a jerin obleadis a tornâ su lis stessis posizions che a vevin prin di scomença il conflit. Ancje il vieri cunfin, segnat in maniere provisorie dal 1518, al fo ristabilît e, come dutis lis robis provisoriis, al durà fin al 1918 cu la fin de prime vuere mondial.

          Un altri mutîf di scuintri tra la Serenissime e Viene al jere il patriarcjât di Aquilee che al veve jurisdizion religjose sei sul Friûl ocidental che oaientâl. Chest fat al jere mal sapuartât dai Asburcs che a cirivin in ogni mut di inderedà la presince patriarcjâl di Aquilee sul teritori de contee di Gurize. La cause e stave tal fat che il patriarcje al jere simpri sielzût tal clero venezian e a ogni gnove nomine Viene e protestave.
          Il pape al cirive, sence dâlu a viodi, di sustignî cheste situazion, parceche al veve pôrè che nomenant un patriarcje o ancje un vicjari austriac par Aquilee e pe contee di Gurize chestis a deventassin une centrâl di podê religjôs gjarmanic. La gjile dai contrascj verbâi, tristeriis e veretâts miezis veris e miezis falsis a lèrin indenant fin al 1628, cuanche Ferdinant II, stuf di cheste solfe, al promulgà un edit che al improibive a ogni gleseastic de contee gurizane di ricognossi l’autoritât dal patriarcje acuileiês. Intant la cure des animis e vignive fidade a un arcidiacun gradît a Viene. Lis cuestions plui impuartantis si frontavin tra il nunzi apostolic di Viene (Dongje a l'Austrie) e il patriarcje di Aquilee. Naturâl che ancje in chest câs no son mancjadis resistencis e formis di astute diplomazie, di une bande e di chealtre, stant che ognidun al cirive di puartâ la aghe al so mulin.
          A un cert pont, par une cuistion ch'e jere lade di mâl in piês, al semeave parfin che si podès rivâ a un'altre vuere parceche l'imperadôr Ferdinant al veve fat presentâ al pape, par mieç dal so ambassadôr, lis plui amâris considerazions sul patriarcje sielzût in tune nazion tant malfidante come che veneziane. Il problem, come che si sa, al fo risolt dal 1751 di pape Benedet XIV che cu la boeo papâl "Iniuncta nobis" al soprimeve la plui che milenarie istituzion dal patriarcjât di Aquilee par fa doi arciepiscopâts: chel di Gurize e chel di Udin.

          L'aiar de Riforme teorizade di Lutero dal 1517 (e la sô conseguent scomuniche dal 1521) al veve soflât ancje in Friul. Lis ideis e soredut la Bibie luterane a jerin rivadis traviârs di cramars, marcjandants e ancje protestants de Baviere, de Carìntie e altris regjons. I pais dulà che il protestantesin si jere insedât di plui a jerin Glemone, Cividât, Udin e S.Denêl, soredut tra chei che a vevin contats cu la Gjarmanie e dal sigûr a cognossevin il todesc. La grande furtune de Bibie tai paîs todescs e je stade merit propit di Martin Lutero, che dal 1534 al veve voltât il libri dai libris te Ienghe volgâr, valadì il todesc. Traviars di chest libri milions di gjarmanics e ancje cualchi furlan a vevin sintût la necessitât di imparâ a lei, fat discognossût dal popul che tes celebrazions religjosis al scoltave il latin che nol capive come che nol capive lis lehghis nazionâls dopradis de nobiltât e de borghesie. Il sucès otignût dal protestantesin, soredut in Gjarmanie, Inghiltere, Danimarche, Olande, ma un pôc dapardut, al creà no pôcje conturbie ae glesie catoliche e, cuntri la Riforme luterane, e organizà il Concili tridentin (1545-1562) che al fo l'inizi de Cuintririforme dal catolicesin. Intant dal 1542 e jere nassude la Incuisizion Romane che traviars i tribunai dai Jesuits e celebrave procès condanant i eretics.
          Il tribunai di Udin al fasé il prin procès dal 1557 e fin al 1797 unevore a fòrin i condanâts. Par ducj si ricuarde il mulinar di Montareâl Valceline Domenico Scandella clamât "Menocchio" Al veve convinzions dal dut personâls su Diu e sul dogme de trinitât. Al sustignive che Diu al è tal aiar e che la tiare e je nostre mari, nol crodeve te virgjnitât di Marie e che il formâsi dal mont dal caos iniziâl al jere dovût al fat che tiare , aghe, aiar, fûc e altris elements a un cert moment si jerin metûts insieme formant une masse grandonone, juste come ch'al fâs il formadi che si forme dal lat cul câli. Dal sîr si jerin formats i viârs che pò a jerin deventats agnui e, tra di lor, i cuatri cjapitanis ''Lucivello, Michael, Gabrie, et Rafael". Menocchio al jere cognossût come grant blestemadôr ma, naturâl, che par lui nol jere pecjât. Il tribùnâl di domandave se nol fòs mat, ma in ogni câs, dal 1586, lu condanà ae preson. Domandade la grazie disint che al veve di mantignî la famee, il tribunâl lu liberà cu la promesse che nol fevelàs cun nissun des sôs opinions. Ma lui, coerent cu lis sôs convinzions, nol ubidì e al tornà a fevelà cun ognidun e in ogni lûc des sôs stravagantis crodincis. Al fo justiziât dal 1601 a Pordenon. Il prin procès par eresie in Friûl, però a1 jere stât unevôrè prime a un cert Biagio Totulo di Butinins, ch.al veve cjapât sù l’idee 1uterane in Carintie là ch’al veve vivût a dilunc. Al fo judicat a Cividât e a1 rivà a puartâse fûr.

          O vin fevelât di un furlan condonat a muart de Incuisizion. Fevelin cumò di un'altre personalitât de nostre regjon che, pur sfidant l'Incuisizion, e je rivade a puartase fûr cun onôr sence rinunzià a lis sôs convinzions. Pauli Sarpi al jere nassut a S.Vît dal Tiliment dal 1552. Inmò di frut al mostrà grant intelèt e passion pe scuole tant di sei mandât tun istitût-pension di Vignesie frecuentât de plui dorade zoventût di che citât. Sui cuindis agns la vocazion lu veve puartat a sielzi la strade dal convent tra i Servits (l'ordin di Turoldo), e lì si jere dedicât ai studis sientifics, filosofics e juridics.
          Dopo agns al fo nomenat procuradôr gjenerâl dal Ordin, mòstrant grande fuarce inteletive e fermece moral., tant di sei clamat dal guviar di Vignesie a risolvi une intrigade cuistion juridiche cuintri i Jesuits di Rome e il pape. La leç de Serenissime no permeteve ai predis di comprà cjasis e bens edilizis senze il permes de autoritât veneziane, ma doi sacerdots, infotantsi des regulis, a jerin lâts plui voltis cuintri il codiç penâl e, par cheste reson, metûts in preson. Pape Pauli V, ch'ai considerave ogni ofese a lui o ae glesie come un'ofese a Crist, al reclamà cuintri la republiche pratindint che i doi predis a fossin liberâts. Ma dôs di Vignesie al jere un cert Lenârt Donà, che sul cont dal stât laic al veve la stesse convinzion dal pape. E stant che al voleve ancje la reson juridiche, al clamâ come difensor legâl Pauli Sarpi. Nol jere facil in chel timp lâ cuintri dal pape ma Sarpi, che nol pative sudizions di. sorte, al scomençà la sû batae. Di che altre bande si cjatà cuintri il cardinâl jesuit Bellarmino, un dai plui dotâts oms di leç.
          Fra'Pauli al puartà indenant il concet che se i gleseastics no rispietavin la leç e il stât che nol intervignive al vignive mancul al mandât che Diu j veve fidât: emanâ lis leçs e fâlis rispietâ sei dai laics che dai gleseastics. Su chest argoment Sarpi al publicà ancje un libri: "Sulis censuris di pape Pauli V cuintri de Serenissime" , là ch'al mutivave lis sôs resons. Invidât a Rome par rispuindi di une tâl ofese, Sarpi al refudà e al fo scomunicât. La cuistion però e veve fat scjàs par dute Europe stant che nissun mai al veve vût cûr di metisi cuintri dal pape. In Inghiltere e in Olande fra' Pauli al fo clamai "il piçul Lutero talian". Rome j mandà parfin dai sicaris che lu pugnalàrin e, crodint di velu copât, lu vevin bandonât tùne stradele veneziane. Invecit al vuarì des feridis e il so coment al fo : "O cognos il stîl de Curie Romane", là che il stîl al jerè il stilet che lu veve ferît. Il dôs e Sarpi, cussients che la leç dal stât e lave rispietade di ducj, ancje dai gleseastics, no vevin cedût nancje al pape. La cuistion e fo risolte, cun tun compromes: Vignesie e consegnave i doi predis presonîrs al ambassadôr francês che ju consegnave al pape, e il pape al ricognosseve la leç di Vignesie. Sarpi al fo amì ancje di Galileo ch'ai insegnave a Padue e cun. lui al tiessé un lunc rapuart epistolâr. Sul tart de vite al scrivé ancje la storie dal Concili di Trent, stant che une opare dal gjenar, scrite di un specialist, e mancjave. Il tratât al fo publicat dal 1617 a Londre, stant che in Italie i Jesuits lu varessin subit secuestrât. Un libri che al jere critic sei viars il papât, assolutist e intransigjent, sei viars certis formis di dogmatisin dal protestantesin. Dopo la publicazion Rome lu invidà di gnûf in Vatican, ma ancjemò une volte Sarpi al refudà. Al muri dal 1623 tra i soi fedei compagns di convent, intant che la vuere dai Trent’agns (1618-1648) za di cinc e veve incendiât mieze Europe: i catolics di une bande, i protestants di che altre.

          Il ‘700 in Eurpe si viarç la lungje e insanganade vuere tra France e Austrie pe sucession al podê in Spagne. Dopo la muârt di Carli II, re di Spagne e ultin ramaç de cjasade asburgjiche, l’Austrie e pratindeve il ream, stant che l’ultin re al jere un Asburc, intant che la France lu voleve par vie che Carli II al veve fat testament a favôr di Filip V d’Angiò, nevôt di Luîs XIV, re di France, clamât re Sole. La vuere si risolverà a favôr del France che cun Filip V e var° la Spagne sot la sô influence, deventant une des plui grandis potencis europeanis. L’Austria, invecit, e ereditarà ducj i possediments spagnui in Italie comprendût il ducât di Milan, che insieme al teritôri di Sondrio, Trent, Bolzan, la Carintie e la contee di Gurize e chê di Gardiscje, e podarà "circonda" i cunfins venazians in tiareferme. Vigniesie in cheste ocasion e jere restade neutrâl, ma e fo ancje obleade a sapuartà che tra Fiume, Triest e la cueste furlane (aghis teritoriâls venezianis) lis nâfs francesis e imperiâlis a combattesin sul so mâr. Lis vicendis culi ripuartadis a fòrin cetant plui complicadis, par vie che a tiravin tal zûc ancje l’emergjent Olande e l’Inghiketere che ormai e paronavin sul mâr. ê sul mâr Adriatic e veve scomençât a fâ concorince a Vignesie ancie la flote austriache, fasint piardi il primât maritim ae Serenissime, che scunide de lote cuintri i Turcs, a jere in dificultât dal pont di viste economic. E cussì il Friûl al restà inmò di plui in dificultât par manciance di riformis, di proviodiments a rivuart dal teritôri, di rinovament des struturis. E je vêre, dilunc il Sietcent no si son vudis lis vueris e si savoltaments dai secui precedents, ancje parceche i cunfins furlans no davin masse motîf di discuardie tra Viene e Vignesie e la balance pulitiche tra doi stâts e jere avonde stabilizade. Siché la vite in Friûl si disglagne tun cuadri gjenerâl mancul tormentât dai secui precedents. Si regjistre parfin una certe riprese economiche e cultural soredût tai centros plui grancj. Ma chest al rivuardave dome la nobiltât e la borghesie, stan che la cundizion de int e jere che di scugnì sapuartà la fan e la miserie e di sei condanade a vivi te plui grande ignorance.
          II guviar di Viene simpri plui dispotic, e chel di Vignesie in parabule dissendent, a jarin ben lontans dal proposit di realizâ vêrs programs di riforme e di fidâ al guviâr regjonâl lis decision a rivuart des necessitâts locals. Se cualchi concession a vignive fate al popui no ubidive a programs riformistics destinâts a l’elevazion de int plui pùare, ma dome ae necessitât di contignî la smare dei contadins, sence disturbà la nobiltât e 1a insiorade borghesie, stant che ancje di chestis categoriis coventave sigurasi la poe. La nobiltât furlane, seneose di conservà i tradizionai beneficis. esclusîfs ch’e veve simpri vût, in gjeneral ai adatâ adimplen a chest gnûf cors, fasint tele cu la pulitiche (e la culture) venite di une bande, e austrìache di che altre. I risultats negatîfs de disgnarvant pulitiche dai dominatôrs a madresserin in plen, soredùt tal Friûl venit, dilunc il cors dal XVIII secul. Sot la patine lustre di una potence ormai balarine e di une false pâs universal, si scuindevin di une bande l’amont des vieris struturis sociâls e pulitichis che no jerin stadis in cundizion di rinovâsi, e di chealtre il ferment di une nassint civiltât ch’e lave trasformant. lis cussiencis a preparant lis cundizions par un mont diferent.
          Dilunc dal Sietcent il Friul al dimostre un alc di vitalitât in plui traviers i soi oms plui inluminâts, che si mòstrin viarts e cussients des grandis fuarcis spirituâls che a movin l'evoluzion de civiltât europeane dal timp, dedicantsi cun impen ai studis umanistics, storics, sientifics e filosofics. Al è il secul dai lums che al puartarà ancje in Friûl un fregul di lusôr. E no dome te culture, ma ancje te agricolture, te economie e tes struturis artesanâIs e industriâls: ma chest al sarà' dome par merit di pôcs oms che di lôr si fevelarà plui indenant. Viodin intant cualchi fat impuartant vivut tal Friûl dal ‘700.
          Ancje in chest secul e continue, tra Viene e Vignesie, la sorde lote diplomatiche par cause dal patriarcje ch'ai veve jurisdizion tal Friûl venit e in chel imperiâl, situazion simpri plui ingredeade, tant che dal 1723 al vignare di gnûf proibît a clerics, vicjaris e a dut il clero gurizan di ubidì al patriarcje ch'al jere a stâ a Udin in teritori venit, intant che dal 1749, par dirimi la cuistion, il pape al nomenarà pal Friûl sot l'Austrie un vicjari apostolic (Carli D'Attems) che daspò al sarà ancje il prin arcivescul di Gurize. E cussi, un pôc par da aes dôs parts di Friûl une guide spirituâl di pari dignitât, ma soredùt pal pressant.intervent de imperadore Marie-Taresie d'Asburc, dal 1751 pape Benedet XIV al soprimarà il plui che milenari patriarcjât di Aquilee. Al jere scomençât cun Paulin prin dal 559 e al finive tal lui dal 1751. In cheste maniere in Italie al restave dome il patriarcjât di Rome e chel di Grau, nassût dal 607. e traspuartat a Vignesie dal 1451, dulà ch'al vîf ancje orepresint. A Udin e Gurize, invecit, a vignivin istituidis dôs diocesis cun doi arcivescui che a varan jurisdizion sui stes teritoris definîts dal tratât di Worms dal 1523, cunfins che al timp a jerin stâts cunsiderâts "provisoris" . Cussi provisoris di durâ inmo orepresint. Tant al è ver che sot la diocesi di Gurize a son restadis Aquilee, Cervignan e i paisuts dulintôr, ancje se chest teritôri al fas part de provincie di Udin.