Cirint lis olmis di Diu

La rivelazion des Scrituris
PRE ANTONI BELINE - La Vita Cattolica del 21 Aprile 2007

     O VEVI JUSTE CELEBRADE LA PASCHE cu lis mês comunitâts, cuant che, a colp, mi à brincât il mâl e o soi tornât a plombâ tal scûr orent dal vinars sant, cu la vite ti sta bandonant e la sensazion di jessi rivât insomp (o dapît) de tô corse.
     Cjantantmi ingredeât tes cjadenis dal mâl fisic e psicologjic, dute la mê vision sflandorose, positive, pascâl de esistence, cu la sigurece che dut al finis in glorie e che no esist situazion o condizion che no vegni riscatade e nobilitade de vitorie di Crist, si è sfantade come un bugjel di biciclete cuant che s’intive tun claut. Anche parcé che, cjalant e sintint i miei compagns di sventure, ognun cu la sô crôs e cui siei dubits, ancje jo mi confusionavi e o scomençavi a clopuçâ.
     Sore dut un, tant provât de vite e deludût di dut, mi à impressionât e dibot metût in crisi. Fevelant dal dolôr ch’al è tun ospedâl e in proporzion ben plui grande e tragjiche tal mont, al sostignive che nol po esisti un Creadôr ch’al à fatis lis robis cussì malamentri e un Signôr che nol rive a paronâ il mâl, a judâ lis sôs creaturis, a salvâlis di tantis soferencis e de robe plui assurde, la muart. Muart e Diu a son incompatibii, parcè che Diu al è vite e autôr di vite, cu la cuâl che la muart, ogni muart e dut ce ch’al puarte a la muart, a son la negazion de vite. Jessint om di culture, mi à tirât fûr ce che Fedor Dostoevskij (1821-1881) al à scrit a proposit des soferencis di un frut, vignût tal mont cence domandâ e che al patis cence vê fat o mertât nuie.
     Seont il gran scritôr rus, un frut malât al vanifiche dute la dogmatiche. E a mi, romantic ancje tal ospedâl, mi è vignût tal cjâf Oscar Wilde (1854-1900) là ch’al dîs che lis lagrimis di un frut tun curtîl scûr di Londre i gjavin al soreli dut il so sflandôr.
     Jentrant in confidence, mi à contât di un zovin di Tresesin, muart cualchi an indaûr, ch’al à tribulât tant, ma tant prime di murî scanât di dolôr e cunsumât dal mâl, che ducj si domandavin invelegnâts
cemût che un Signôr, s’al jere, al faseve o al lassave tribulâ in chê maniere selerade une puare anime nocente. «Se ancje, come ch’al dîs lui, i dan il paradîs, rivarano cincuante paradîs a rifondilu dal mâl ch’al à frontât in chest mont?».
     O sai che a son lis solitis, classichis obiezions su la contraditorietât fra Diu e il mâl, che un cualunche scuelâr di teologjie, e tant miôr un teolic, tes distrighe.
     Però une robe e je fevelâ di Diu e di mâl di front a un tai di vin o tun incuintri culturâl e une robe e je fâti chestis domandis biel che il mâl ti sfruçone dì par dì.Resonant, e resonant ben, il mâl e la muart a son la sconfite di Diu e il plui gran acusadôr cuintri di lui e de sô esistence e provedence.
     Nol è di maraveâsi se, denant dal mâl personâl e dal mont, plui di un si cjate a scûr e al rinunce a cirî ce che, seont lui, nol esist.
     No volevi fâ un contraditori cuntun che al sfladassave come me. Un bon rapuart uman al vâl plui di une discussion teologjiche astrate. Mi è vignût però tal cjâf il câs dai doi dissepui di Emaus e des peraulis che ur dîs il compagn mistereôs e providenziâl: «Il Crist no vevial forsit di patî dut chest e dome cussì jentrâ te sô glorie? E scomençant di Mosè e di ducj i profetis, ur spiegà ce che dutis lis Scrituris a disevin di lui» (Lc 24, 26-27). Se la soference e je viodude e vivude seont la rude razionalitât e je un scandul e une assurditât. Se invezit si va plui indenant e si le cjale seont la rivelazion des Scrituris, alore e devente la strade privilegjade e sigure par jentrâ in glorie.

Vitis sbaladis
PRE ANTONI BELINE - La Vita Cattolica SABATO 10 MARZO 2007 

     O STAVI RUMIANT suntune des pagjinis plui bielis dal vanzeli, chê dal fî che si slontane di cjase e al consume e si consume dut. Il vanzeli al fâs di cheste sielte e vite disgraciade une ocasion di perdon e di resurezion morâl, parcè che il fî si pentis e al torne. Ma te vite nol sucêt simpri cussì.
     O, miei, al sucêt simpri plui dispes che te zoventût si sassini vite e salût, ma il tornâ dongje al è simpri plui problematic. E, di pinsîr in pinsîr, la memorie mi è lade a un zovin, o om realtivamentri zovin, sui 40 agns, che o ai soterât cualchi an indaûr e che forsit la memorie coletive e à spesseât a rimovilu come ducj i câs che no si à voe di tignî presints.
     Al jere un brâf zovin, bogn e compagnon e disponibil in dut. Po la svolte. Al è lât pal mont a cirî lavôr e lajù, tai paîs dal mont musulman, al è sucedût alc che lu à comprometût par simpri. No si à savût se par colpe sô o di chei altris, se par debolece e par fatalitât, sta di fat che si è intivât tal mont de droghe che, messedade cul alcul, i à cjapât il çurviel. Al è tornât dongje che nol veve nancje trent’agns, ma nol jere plui lui. Lu àn ricoverât ta chei lûcs che nissun nol ame vê indiment e li si è finît di ruvinâ.
     Ancje la sô vite sentimentâl, se si podeve fevelâ di passion, e je stade une tragjedie. Al à cognossudis dôs feminis che a àn spartît cun lui il so infier.Une e je muarte doi agns dopo e la seconde cuatri, cunsumadis dal alcul che a scolavin insieme cun lui.
     Il pari si è svenât par lui. Par dâi un sotet che i permetes un fregul di dignitât e di indipendence, i à comparde ancje une cjasute e, stant che il zovin nol vignive mai in paîs par pudôr o par vergogne, nol saltave setemane cence lâ o mandâ a viodi di lui. Lu proviodeve di dut, ancje di ce che nol varès podût o volût, ma dut di bant. Fin che une dì lu àn cjatât colât in cjase e lu àn menât di dute corse, une corse disperade e inutil, tal ospedâl.
     Mi visi come cumò la pesantece di chel funerâl, il contrast fra il soreli che nus sclipive e il scûr che si veve dentri, cu la int che no olsave a lâ dongje de casse di chest paesan aromai forest e la brame di fâi companie almancul tal ultim viaç. I coscrits i vevin preparât une biele composizion di rosis e mi è vignût spontani di fâ un confront fra la rose e la vite, fra il sflandôr de rose cuant che e fluris e la pene che ti dà cuant che e sfluris.
     Ancje chel zovin al jere stât une rose, rose vive e splendide, ma la sô bielece si jere smamide prin dal timp e ti faseve spessie a cjalâle te sô decomposozion inarestabil. O ai fevelât de pietât, dal vêl che si à di vê denant dai muarts, sore dut di chei muarts che, usance nô, a àn ruvinade la vite. Il funerâl nol è il lûc e il moment de condane, ma de remission. No si puarte in glesie un muart par santificâlu, ma par metilu tes mans dal Diu ch’al perdone. Tant plui che ognun di nô, ce pôc ce trop, o vin fatis lis nestris macacadis e si sin slontanâts de cjase paterne.
     Il nestri puar zovin, a la fin de sô vite tribulade, nol à cjatade la cjase paterne, parcé che nol à vût il coragjo o la volontât o la gracie.Ma Diu lu spietave, anzit i leve incuintri par strengilu tai siei braçs, par padinâ il so cûr plen di pôre, par vuarî la sô anime malade cu la midisine de eternitât. Chel Diu ch’al è a la fin, a l’inizi e tal mieç. Ancje se no lu savìn e no lu volìn.

Memorie infoibade
PRE ANTONI BELINE - La Vita Cattolica SABATO 17 FEBBRAIO 2007

     LA SUPERFICIALITÂT dal om lu puarte a ripeti lis stessis falopis, usance Pinochio.Ve alore la reson des zornadis de memorie: onorâ lis vitimis e judâ lis gnovis gjenerazions a no cjatâsi cul stes belanç falimentâr. L’ultime le àn istituide dal 2005 par ricuardâ lis vitimis des foibis titinis e l’esodo di centenârs di miârs di istrians e di dalmatis, a seguit dal tratât di Parigji, firmât ai 10 di fevrâr dal 1947, che al consegnave a la Jugoslavie l’Istrie e la Dalmazie, teritoris di secolâr dominazion veneziane e di culture latine.
      Ce che mi fâs dubitâ de utilitât di chestis comemorazions al è che i vêrs protagoniscj no son lis vitimis muartis e chês restadis in vite, ma lis formazions partitichis o ideologjichis, che a doprin la storie come une tiracje e, se no ur torne cont, a fasin di dut par rimovi lis pagjinis no propit esaltantis de lôr militance. E il câs in cuistion al è emblematic e scandalôs. Tant par chei de çampe, che no volevin sputanâ i comuniscj, che chei de drete, che no volevin che si metes in lûs i antefats de tragedie che e à insanganât lis dolinis dal 1943 al 1945 e ancje dopo. In chescj dîs si à fevelât tant, finalmentri, di cheste tragjedie te tragedie e lis vôs plui libaris, sapientis e autorevulis a àn invidât a cirî la veretât. No par doprâle come un racli cuintri dal aversari, ma par rindi justizie e fâ lûs suntun scûr tant penç e tant protezût. Tra lis tantis vôs, no mi àn convint chês che a cirin une veretât crude, frede, di contabil.
     Chês che, cu la scuse de obietivitât, a van a viodi se i infoibâts a jerin 10-15.000 come che si va disint o dome cualchi centenâr come che si cjate in certe documentazion. Sino sigûrs che i criminâi a vedin vût il timp e la pazienze e l’onestât di scrivi propit dut, a partî di chel che no ur comodave? E se ancje a fossin dome cualchi centenâr, stressino mancul delincuents? Oscar Wilde al à scrit che se ancje une sole persone e reste vitime di une ideologjie, al è un presit inacetabil.No mi àn convint lis reticenzis dai partîts di ispirazion comuniste, che no si rassegnin a ameti il lôr compuartament criminâl cul principi, stupit, che la violence fassiste e je piês di chê comuniste, come che Hitler e Mussolini a son plui criminâi di Stalin e di Mao. Ancjemò mancul mi convincin i proclamis dai nazionaliscj e dai postfassiscj, che si vuardin ben di contâ dut ce che l’Italie e à fat tai agns vergognôs de ocupazion militâr e civîl. No vuelin ameti che la pulizie etniche e je stade une invenzion nostrane prime che titine e che la reazion sproposetade e barbare dai titins e à nudrît il so velen te prepotence, te ignorance, te presunzion di superioritât che l’Italie e à simpri vût e e continue a vê tai confronts dai sclafs.
     Baste viodi i fans di An, che si batin pai dirits de minorance taliane di là biel che a dinein e a folpein in ogni sisteme i dirits de minorance slovene di ca.
     La memorie e à sens dome se ogni part, dongje dal ricuart dolorôs, e cîr di purificâ la propie anime fasint un esamp di cussience sui propis erôrs, plui che fâ la liste des carognetâts dai aversaris. Un esempi positîf lu à dât il vescul di Triest, Ravignani, sfolât a 12 agns di Pola e rivât a Triest suntun cjâr di besteam. Al à ricuardât i martars, a partî di don Francesco Bonifacio, copât e infoibât a 26 agns, e don Miro Bulešič di 27 agns, viceretôr dal seminari di Piran, che i àn taiât il sgrasolâr te canoniche di Lanischie. Ancje Ravignani al è martar, testimoni vivent de tragjedie dal so popul. Ma lui al à savût elaborâ une esperience traumatiche in percors di riconciliazion.
     Dome cussì si po jemplâ il vueit di umanitât des foibis cun chê sperance che e à di tignî sù la gnove Europe.

Profezie nostrane
PRE ANTONI BLINE - La Vita Cattolica del 3 Febbraio 2007

     IN CHESCJ DÎS, la liturgjie nus presente i prins pas che Gjesù al fâs sul scomençâ la vite publiche. Un percors no cui sa ce lunc in timp e in spazi, che lu puartarà a fâsi amì dai tribulâts, dai puars e dai piçui e, conseguence inmediade, no cirude ma scontade, a sfidâ l’ostilitât dai aparâts plui alts, siôrs e riverîts.Nol è che lui si meti cuintri. E je la sô predicazion, il so mût di fâ, la sô libertât denant des custumancis umanis e ancje religjosis. Paraltri lu veve za dit il vieli Simeon, te pagjine umanissime de presentazion al templi, che il Frut al sarès stât cause di ruvine e di resurezion. Par impedînus chê neutralitât tant comude che nus sburte a dâi reson a Diu e al gjaul.
     Gjesù al scomence il so ministeri in Galilee, là ch’al è stât tirât sù e là che al podarès pratindi une udience particolâr e invezit si cjate circondât de malinfidence e dai prejudizis di chel che al à la bocje dome par fevelâ e a sproposit. Lui si lamente cun chês peraulis incoradis che a son passadis in proverbi e che a cjatin sistematiche conferme. Il so lament dolorôs al è: «Nissun profete nol cjate bon acet inte sô patrie» (Lc 4, 24). Che il profete al stenti a cjatâ sensibilitât e simpatie al è un dât di fat e no podarìn mai dolêsi avonde di vê sbeleât e emargjinât i profetis che Diu al mande in ogni ete e in ogni tiere. Ma la robe si po ancje ribaltâle.
     Tal sens che ancje il popul al stente a cjatâ il so profete e no simpri si trate di tristerie o di viltât.Plui di une volte e di dôs e je la struture che e emargjine il profete e lu fâs passâ par mat o soversîf come se ancje Crist nol ves vût il stes judizi e il stes distin.
     O pensavi a dut chest cualchi dì indaûr, cuant che par television al è stât fat un dibatit su la base Nato di Vicenze, che i merecans a vuelin slargjâle, sbombansi di chei che la pensin difarent, etichetât cu la etichere plui banâl: comunist, antimerecan e cualuncuist.
     I intervents a son stât variegâts ma no al altece de cuistion. I argoments plui fuarts a jerin lis buteghis che a vendevin di plui, i puescj di vore, la ricognossince eterne pal aleât merecan. No si è lâts plui in là dal tacuin e de ideologjie. L’unic che al à frontale la cuistion de bande de pâs, de riduzion des armis, de difese dai puars e che al à fevelât in maniere profetiche al è stât don Pierluigi Di Piazza. Insepirantsi ai documents eclesiâi, a don Milani e sore dut al vanzeli, al à fat capî che la strade dal potenziament nucleâr nol puarte di nissune bande; anzit e puarte a la disrtruzion dal mont. Il scandull al è che potencis democratichis, civîls e avanzadis a vedin simpri un poç di bêçs par distrugi e mai par fâ sù. E che in barbe a dutis lis sconfitis dal om e dal cristian, no si rivi a tentâ une strade alternative, pacifiste, de bande des folis plenis di fan, di sêt e di fastidis.
     Un politic di gjestre al à clamât «grottesco» il mût di resonâ di Pierluigi, che lu à invidât a ritirâ l’ofese fate a lui e a ducj i puars dal mont che lui, in maniere indegne, al rapresente. O scuen dî che pocjis voltis mi soi tignût in bon di vê tal nestri presbiteri un testemoni come lui e di gjoldi de sô amcizie.
      Celebrantsi la zornade de vite, e covente une per aule clare, esplicite, coragjose. Se no je vite impedî di jemplânus di bombis atomichis! Al è evident che se a tasìn sun chestis cuistions vitâls, no podìn pratindi di jessi scoltâts e ubidîts cu la stesse fedeltât cuant che i fevelìn di embrions e Pacs.Don Dilani al è scrit: «Se no podarìn salvâ il mont, almancul o salvarìn la nestre anime e la nestre muse».

Une fonde spirtuâl
PRE ANTONI BELINE - La Vita Cattolica del 27 Gennaio 2007

     UNE DES PAGJINIS DE BIBIE che plui mi àn impressionât e je chê de leture de leç che il predi Esdre al fâs denant «dai oms, des feminis e di ducj chei ch’a jerin in stât di capî» (Ne 8, 3), par ordin e in sintonie spirtuâl cul governadôr Neemie.
     Neemie e Esdre a son l’anime de ricostruzion di Gjerusalem, sore dut dal templi e des muris, e di dute la tiere devastade dopo de incursion e de depuartazion par opare di Nabucodonosor (587 p.d.C). Se si ves di cjatâ un spieli di chestis dôs autoritâts, une civîl e une religjose, si podarès rifâsi a une stagjon inmò plui tragjiche de storie dal popul ebraic, la liberazion dal Egjit par opare di Mosè e di Aron.
     Tornâ a fâ sù un cjase, un paîs, un popul al è forsit plui dificil che fâlu la prime volte. Parcè che la prime volte tu âs dute la brame, l’emozion, la sgrimie di chel che al spiete di realizâ un sium. Il tornâ a fâ sù al presupon un flagjel, un fat traumatic e duncje une int provade e disperade, che e vîf cu la memorie de cjase, de glesie, dal paîs di prime, simpri tentade di inemorâsi in maniere periculose a la prime inmagjine e esperienze e di stentâ a adatâsi a la seconde, psicologjicamentri inferiôr.
     Duncje la ricostruzion e je une scomesse plui grande de costruzion. Lu àn provât i ebreos, ma lu àn provât e lu provin ducj i popui ch’a son passâts par une vuere disgraciade e cruente o par un taramot o un maremot devastant. Nô furlans, almancul la nestre gjenerazion, lu vin provât a la fin de ultime vuere e cul taramot dal 1976.
Par fâ sù une cjase o un paîs, la prime robe che ti ven tal cjâf e je metiti a fâ plans regoladôrs e calcui di fier, di modon e di travamente, a procurâti il matereâl e a metiti a scavâ fondis par podê fâ sù.
     O crôt che anche Esdre e Neemie lu vedin pensât tal lôr câs. Ma a nd àn pensade un’altre, plui profonde e sapiente. Prime di tirâ sù i mûrs, bisogne tirâ sù la int, e prime di fâ un plan regoladôr matereâl, bisugne fâ un plan regoladôr morâl e spirtuâl. Parcé che ogni fonde umane, ancje la plui in sot e sigure, e je distinade a falî e a finî, usance dutis lis robis matereâls, e dome il spirt al rive a vinci e a dâi anime al timp. Il spirt ch’al vivifiche la materie, la morâl e la religjon che a dan consistence, valôr, significât a ogni nestri progjet e realizazion.
     Chest principi, cussì scontât inte bibie e cussì discutibil par nô razionaliscj e laiciscj a prove di reson e di sintiment, al è ribatût cun fuarce e clarece tun salm: «Se il Signôr nol fâs sù la cjase, i muradôrs dibant a lavorin. Se il Signôr nol ten di voli la citât, il vuardean dibant al vegle» (Sal 127, 1).
     No son lis struturis, no je la fuarce militâr e nancje chê nucleâr che a dan stabilitât a une popolazion e al mont, ma la moralitât, l’etiche, la spiritualitât, la fede. Cence morâl e cence religjon ogni progjet, ancje il plui ambiziôs, al riscje di falî.Cu la morâl e la religjon, cu la cussience e la fede si torne a fâ sù cualunque cjase o paîs o nazion.
     Lis nestris cjasis a varessin di vê, dongje o prime dal pac des cjartis dal architet e dal ingegnîr, la liste dai dîs comandaments, par no lâ in sfas, e la liste des beatitudinis, par vê serenitât e plenece di vite.Ce valino lis leçs, i provediments, i codiçs civîi e penâi, i tratâts se e mancje la cussience che ducj nô o sin fîs di Diu e duncje no sin parons espotics, e fradis fra di nô, e duncje in dovê di rispietâsi e di dâsi une man?
     L’amôr di Diu e dal prossim a son un deterent ben plui sigûr dai garbenîrs e des presons.

Par amôr di Sion
PRE ANTONI BELINE - La Vita Cattolica del 20 Gennaio 2007 

     E JE UNE DES TANTIS PERLIS dal libri di Isaie. Il profete si riferis a la gnove Sion, dute di fâ sù cu la gracie di Diu e cu la colaborazion e coresponsabilitât dal om. Di li la passion che e sburte il grant profete a berlâ e a cirî ogni strade e ogni mieç par rivâ in puart cuntun progjet cussì ambiziôs. «Par amôr di Sion no tasarai e par amôr di Gjerusalem no mi darai pâs fin che la justizie no crichi tanche l’albe e la sô salvece no lusi tanche une torce» (Is 62, 1). Peraulis cussì splendidis e incoradis no podevin no fâ vignî la gole a tancj oms, sore dut di glesie, di doprâlis come cjaveç di un document impuartant.
     Lu àn fat gardenâi, vescui, predis, ancje chi di nô. A son peraulis tremendis e impegnativis, che a van pesadis une par une. Partìn di chel no tasê, di chel scugnî fevelâ, di chel imperatîf morâl di alçâ la vôs pe denunce di ce che nol va e pe proclamazion dai principis juscj.
     La glesie interie, tes sôs struturis di ogni ordin e grât, in alt e in bas, no à altre justificazion e mission che di no tasê, di fâsi cussience universâl. Ma par podê berlâ, par no jessi obleade a tasê e à une sole strade obleade: jessi libare. E par jessi libare e à une sole strade obleade: jessi puare. Une glesie fuarte, potente, temude e rispietade no rivarès a sintî il berli dal puar, il gemit dal presonîr, il jesolâ de vitime. Parcè che i mûrs dal so palaç a saressin masse pençs e lis stanzis dai siei ufizis masse altis e distantis par sintî i dolôrs de strade e de vite. Al massim e podares fâ documents astrats, che no le metin in crisi jê e ancjemò mancul i distinataris dai proclamis e autôrs de injustizie e che di sigûr no zovaressin a di chei che a varessin di jessi i prins beneficiaris, vadì i ultins di chest mont. Se ancje e rivas a sintî il berli, no podarès berlâ masse parcé che e sares tignude di voli e ricatade di un continuo di chei che le frecuentin e le slissin, che i ricuardaressin, se e ves di dismenteâsi, i dovês di coretece, di buine armonie e di agrât tai confronts di chel podê che le trate cun tante gjenerositât. Il no tasê, il no dâsi pâs al po jessi verbâl e scrit, ma al po jessi ancje morâl, di testemoneance. Al vâl di plui e al è capît di plui.
     Il vescul di Varsavie, Stanislaw Wielgus, al à scugnût dâ lis dimissions di primât polac la stesse dì che al cjapave posses de sô diocesi, cun grant scandul e turbament de int. Al veve acetade la colaborazion cui comuniscj par podê lâ a studiâ in Gjermanie e preparâsi miôr a la sô mission. No varessial vude une preparazion plui fuarte e cristiane restant a cjase e magari lant in preson par amôr di Crist e dal so popul? Pari Jerzy Popieluzsko, cu lis sôs messis pe patrie e cu la sô fin orende, torturât, incjavretât e butât muribont te Vistole, no aial berlât di plui, seben che al veve la bocje stropade?
     Il berli plui grant dal cristian al ven de sô vite e no de sô bocje. Il profete al dîs che no si dà pâs pal ben di Sion e di Gjerusalem.Tant a dî che la robe plui impuartante, essenziâl e inrinunciabil, al è chest amôr pe int e pe tiere. Un amôr cence condizionaments e cence ripensaments.
     Domandìn il regâl e la gracie di une glesie che no à altre passion, mission, preocupazion, manìe che il ben matereâl e spirtuâl dal om, disponude ancje a murî par lui.Une glesie che no si sint indispensabil, ma dome sierve inutil tes mans e tai progjets di Diu.

Paternitât e dolôr
PRE ANTONI BELINE - La Vita Cattolica del 2 Dicembre 2006 

     IN CHESTIS ZORNADIS che si van scurtant e cun chest scûr di fûr che al riscje di invuluçâ ancje la nestre anime, il pinsîr al va di bessôl a la fin. No dome fin di un an, ma ancje fin de vite e fin dal mont. E a ce che al compagne e al fâs precipitâ cheste fin, come il dolôr fisic e morâl e la muart.
     In chest contest pesant, che ti sburte a fâti lis domandis plui tremendis, al cjape simpri plui pît il pinsîr negatîf, chel de assurditât de vite, o dal cjastic dal vivi, e duncje il nichilisim. Tal sens che la vite no à nissun principi e nissun valôr e nissune sperance e nol esist nissun Diu che le governi cu la sô volontât e le riscati cu la sô provedence.
     Il dolôr dal mont al met in crisi no dome l’om, ma ancje Diu. E al devente un scandul, une robe che ti fâs inçopedâ. In chescj moments jo o cîr di impiâ l’unic lusôr che mi puedi indreçâ e confuartâ, chel de per aule di Diu.
     O voi a cirî tal libri di Diu chês rispuestis che no cjati tai libris dai oms. E lis rispuestis che il libri mi dà no son dutis comprensibilis e logjichis, ma o sai di podêmi fidâ, come il frut che si lasse menâ dal pari e da la mari ancje in lûcs che nol cognos e no i smechin.
     Intal vanzeli di Zuan e je une pagjine straordenarie, chê de malatie, de muart e de resurezion di Lazar (Zn 11, 1-27). Lazar al è il fradi di Marte e di Marie. A vivevin a Betanie e Gjesù al jere di cjase li di lôr. A pene che Lazar si inmale, lis sûrs a mandin a dîi: «Viôt, Signôr, che chel che tu i vuelis tant ben al è malât». No disin nancje il non, parcé che il rapuart al jere speciâl.
     La domande che nô si fasìn e je banâl e tremende: «Se tu i vuelis tant ben, parcé vuelistu o lassistu che si inmali e di un mâl cussì grant di puartâlu a la muart?».
     Cemût si rivial a conciliâ l’amôr che Diu al à pal om e pal mont cul dolôr, cul mâl, cu la tristerie, cu lis injustiziis ch’a son tal mont? Sore dut cemût conciliâ o salvâ chest amôr denant dal scandul de muart?  Cemût puedio dîi a une mari cul frut malât che Diu al è pari o a un ch’al piert une persone cjare che il Signôr nus vûl ben? Cemût rivìno a cumbinâ chest amôr cussì grant cu lis tragjediis ch’a son sucedudis e ch’a sucedin ogni dì inte storie?
     Al vûl fiât a fevelâ di amôr di Diu tai lager di Auschwitz o di Dachau o tai gulag di Stalin o tal maçalizi dal Ruande o dai Balcans o de Cambogje o tes esplosions di violence e tes distruzions dal Orient.
Une cuistion no scontade, une rispueste no facil, anzit umanamentri impussibil. Al semee che il mâl ch’al è tal mont al sedi la prove provade de inesistence o de indiference o de impotence di Diu.
     Epûr o sin clamâts, in ogni moment e situazion, a rispuindi al scandul dal mâl e de muart cul scandul de fede tal amôr di Diu. Un amôr difarent dal nestri, alternatîf, mistereôs, come che difarent, alternatîf e mistereôs al reste Diu. No sin clamâts a capî, ma a crodi, a fidâsi.
     Acetìn alore la motivazion che Crist al dà de malatie mortâl di Lazar so amì e di dutis lis creaturis, cussientis e incussientis, che lui al è pari e redentôr: «Cheste malatie no je pe muart, ma pe glorie di Diu, par che midiant di jê al sedi glorificât il Fî di Diu» (v 4).
     Il dolôr e la muart, ch’a varessin di jessi la negazion di un Diu provident, a son la strade plui drete pe sô glorie e pe nestre glorificazion. E la crôs, che e varès di jessi la sconfite di Diu, e devente la sô vitorie. Scandul, misteri, meracul de fede!

Tornant a cjase
PRE ANTONI BELINE – La Vita Cattolica del 25 Novembre 2006

     IL DISTIN O LA PROVEDENCE e à volût che o passas buine part de mê vite tun lûc di sanscugnî ma par nuie golôs, l’ospedâl. In pratiche, une dì sì e une dì no, o partis cu la sportute des mês robis par lâ a netâmi il sanc.
     O sai che no soi dome jo e che l’ospedâl al è plen di malâts piês di me, ma ognun al sint la sô pache.
     Nol è stât facil e nancje nol sarà, se si pense che si scuen lâ fintremai l’ultime dì, se e cole di lunis, miercus o vinars, cun cualunche timp e cun cualunche malatie.
     Fortune che il Signôr o il gjaul o semplicementri la nature ti gjave chescj pinsîrs che a deventaressin une ossession e tu vâs indenant cun relative serenitât.
     Se mi pese il partî, come paraltri a ducj, mi zove tant il savê che, passadis chês oris, o tornarai a cjase, a ripiâ chel sbit di vite che mi reste e a fâle rionâ, come cun dutis lis robis misuradis.
     Mi jude tant il viodi che, dal mâl al malan, o pues fâ lis robis di prime, ancje se a scartament ridot. No ai flât di ringraciâ la int che si contente e mi contente cu la sô disponibilitât e passience.
     Mi disin simpri: «Ch’al fasi ce ch’al po o nancje nuie. Nus baste di vêlu chi cun nô».
     Ma dongje de int dal paîs e di Ivana, che mi prepare chei plats plens di afetuose fantasie, mi da fuarce il savê che cualchidun no mi spiete dome par fâi companie o par dâi une peraule buine, ma parcè che la sô vite e dipent da la mê.
     Mi riferis a la mê fameute a cuatri talpis o a dôs alis che ogni dì a cjapin de mê man il sostentament che ur permet di tirâ indenant.
     A pene che o vierç il puarton di cjase, anzit prime che o meti la clâf te clavarie, o sint il baiâ legri des mês cjiçutis, puntuâls come orlois svuizars.
     Par solit no ur dîs une peraule, ma o cjali chês codis ch’a bateculin come matis e mi domandi se si po palesâ cun plui clarece e delicatece la propie sodisfazion e devozion.
     I cjans no àn finît di fâ fieste che a tachin a gnaulâ i gjats. La Grise no vîf in cjase e mi spiete tal curtîl, là ch’e je parone espotiche, dutune cul risultât des sôs aventuris galantis.
Se mê mari, cu la sô miserie, e à rivât a nudrî cinc fîs, o rivarai ben a passi cinc gjats cu la bondance di vuê.
     Prime di sentâmi o ai un altri compit: jemplâ il cit dal mei e chel da l’aghe dai canarins, che no puedin cjantâ cul cuel sut e cu la panze vueide.
     Sistemade la mê fameute animâl, o scuen proviodi ancje a di chê vegjetâl, che e vîf di aghe e di lûs.
     Ancje lis rosis a spietin, e si fasin capî benon, cul cjâf ch’al pendole, cuant che a son a sut.
     Ogni tant mi domandi: «Ce saraial des mês besteutis cuant che no rivarai plui a viodi di lôr?».
     Une domande che mi fâs penâ, come che a penin ducj chei ch’a àn cualchidun di proviodi di pan e di gaban.
      A pene che o sint la forade dal aviliment, ur dîs a lis mês besteutis: «Preait plui ch’o podês e miei ch’o podês, vuacant, gnaulant e sivilant, par che o puedi continuâ a fâ cun vualtris ce che il Signôr al fâs cun dutis lis creaturis».
     Al è impuartant, al è biel, al è fondamentâl tornâ a cjase.Ma, par tornâ a cjase, tocje vê une cjase, fisiche o culturâl o spirtuâl.
     Se no si à nissun che ti spiete, se no si à dulà tornâ, alore sì che la vite e devente grivie e cence lûs. In chescj timps di diaspore gjeneralizade, vìnei ducj une cjase di tornâ o sìnei condanâts a une eterne profugance?