cjantin par furlan, par talian e par sclâf...

CE BIELE LUNE

Ce biele lune
che cuche tal nûl..
Sint ce ch’al zorne 
chel puar rusignûl..
Ce biele sere
ce gnot dal Signôr,
ven cà Rosute
ven cà biel amôr,
ven cà Rosute
ven cà biel amôr.

Ven cà ninine
no stà la a durmì
Rosute biele
ti spieti culì.
Su, che la lune
si scuind daûr il nûl.
Anin insieme
a sintì el rusignûl
Anin insieme
a sintì el rusignûl.

Mandi Aldo, sgarfant tai spartits e ai cjatade chiste vilote. Dal manuscrit non soi rivât a capì cui che le à scrite, a pensi ch’a sei popolâr. A fevele di lune , di gnot dal Signôr, di rosutis, e ancje dal nestri cjâr amì : el rusignûl. Parsore di dut al svolete simpri l’amôr. Mi pâr vonde in armunie cule zornade di san Valantin. Stami ben. Natalino, Cjasteons el 14 di fevrâr dal 2001.