Nadal

Mandi Aldo e mandi a ducj chei ca cuchin el “Nadison”.
O vores fà i augurios di Bon Nadâl a ducj cunt'une puisie che me gnece, Maurizia Tomasin, e à scrit dal 1974 a dodis ains .A je stade musicade pa le cantorie dal domo di Udin dal mons.Perosa.

GNOT DI NADÂL

In che gnot plene di stelis,
quant che il frêt si fâs sintî,
son Marie e sant’Osèf
che un ripâr van a cirî...
A ogni puarte lôr a tuchin,
ma nissun i dîs di entrà
cul mussut ch’a ur fâs strade,
t’une stale ur tocje là.
Li Marie benedete
da a la lûs il Redentôr.
Corin ducj par adoralu
dal plui puar al plui siôr,
la Madone plete, plete...
a lu cjale cun amôr
e contents a cjantin inos
i pastôrs a tôr a tôr.
Tu ninin nassût te grepie
tu âs urût a nô insegnà
che la pâs in chieste tiare
si la cjate cul preà...

Le musiche che si sint sot vie a jè une composizion dal mons. G.B. Candotti clamade "Bericchinissima"; nò a le cognossevin come “le pastorele”e a podeve sei considerade le “colone sonore” di dutis li funzions dai nadai di cinquante ains fa. A si trate di un toc legri che, a crôt, ducj i organiscj dal Friûl e vedin sunât a Nadal a l'ofertori de messe. El timp, cuasi di mazurche, al à fat batti i tacs, in glesie, a plui di cualchi frutate e ancje a cualchi vecjute.
El presepio che si viot chi sot al’è stât fat di doi zovins di Morsan, Gabriele Campeotto e Enzo Braida .Ogni an lu ambientin in t’un lûc carateristic furlan.