Tal me pais la che soi nasùt, Cjasteons di Strade, tai ains tra el 1945-50 a si leve une volte a lán in "pelegrinagjo" a Madone di Mont, par ringrazia le Madone e el Signôr pa lor providence!
            A chi cûmo in Canada la ca soi a stá, ogni volte ca vjolt une slitte, tirade da cjavai "SLEIGH RIDE O UN HEY RIDE" a mi ricuardi simpri dai pelegrinagjos di Madone di mont!
            A l'e l'an 1949, Pasche a ere pôc ca ere passade, e no frùz avevin appene finit di "batela e scarozela" dopo rosari in glesie, cùmo nol restave altri che di speta, di la in pelegrinagjo a Madone di mont! A bisugnave lasá le caparre e prenotá el puest sul cjar dai Bacans di "Sis" a mancùl un mes e miez prime di partí. Durant dúc i ains pasaz le tarife a ere di quatri cent francs, ma chest àn parce che i Sis avevin mitudis tal cjar li arvuedis di gome come ches da machinis, e si viazave plui confortevolmentri, che no cun ches di len e fiar, el presit a l'ere lat sù a quatri cent e cinquante francs!
            Si partive simpri di chel stes orari, e di chel stes puèst! Ale une e mieze dopo mieze gnót. Da place dal pais, devant le glesie, sot el tór (cjampanili). A si sintavin ator el cjar cui pis in iu, e altris tal miez dal cjar sintaz su li balis di stràn! Durant el mês di Juin, e adóre le mattine al faseve ancje mo fresculin e cûsi a si taponavin cun qualchi sfilzade o qualchi capót restat in daûr dai Cossacs dopo le guere. A erin in cirche une cinquantine di personis e fruz! Doi cjavai di fuarze a tiravin el cjar cal veve li arvuedis ben ontis cul "smir"!
            Quant ca erin sul stradón ca nus puartave viars Udin e Cividat, mi par ancje mo di sinti el "tic toc, tic toc dai cjavai e le int a cjantá," MADONNA DI CASTELMONTE, PREGATE GESú PER NOI !"
            Pôc prime di rivá a Udìn al scomenzave a "crica" el dí, e si scomenzave a viodi li culinis di Cividât, e le int a diseve: Vioditu la ca vin di la? No mi par vere! Ha Madonute benedette iudinus!!
            Dopo passat Udìn sul stradòn viars Cividât a le un tôc di strade la ca si viot su li culinis, el paisùt di Castelmonte! Mi ricuardi che me mari a mi dismoveve par dimi "vioditu Walter, vioditu la ca e le Madonute, a le la, ca vin di la, Ha Madunute ce tant lontan ca tu ses, ma no vignin instes a cjatati! Salve Regjne mari....!"
            Di Cjasteons a Cjararie a son cirche cinquante chilometros, e no cul cjar a mettevin cirche vót oris par riva a Cjararie, cenze mangja e si e no si beveve une taze di aghe parce che avevin di fa le comuniòn! Si rivave a Cjararie viars lis nùf, mi par come cûmo, quant ca si rivave, a distacavin dal cjar i doi cjavai ca erin duc sudàz, cul sudor cal coreve iú dal lor cuàrp come sal ves plovut! Ió ca vevi nuf-dis ains a cjalavi i cjavai cun d'une certe pène di lor, e une certe gratitudine par venus tiráz cusi lontan... ubidienz, e cenze mai lamentansi.... Chei doi cjavai a li, dai Bacans di Sis, a mi son simpri restaz cjars tal cûr!
           Di Cjararie a Madone di mont a erin cirche sièt chilometros di strade di montagne, cenze sfaltà, e nó ducju avevin cûmo di fale a pìt disínt qualchi prejere strade fasint! Durant le strade a cirche un o doi chilometros di un a che l'altri a erin i "casei" (une pizule nicchie) cun d'une pitture da Madone, e no si fermavin dúc lí, a disi tre (salve reginis) e fa li crosutis cui stecûz di len!
             Quant ca si rivave sul plazàl sot le glesie a l'ere come un grant solievo....ma ancie mo no si ere rivaz in glesie!
Dal plazal sot le glesie (che cûmo a le un parchegjo) fín in glesie a sòn cirche quarante scjalins,... che me mari ma i faseve fá, cun je cui zenoi!!.. E strade fasìnt a si diseve rosari...Mi ricuardi che me mari a diseve..."Ti prei Madonute benedete ten da menz i mie frûz....E el me omp ca le a vore in Svizzare di besòl". (No ai mai sintut me mari a prea par je, ma simpri pa so famee, e chei mancûl fortunaz!!) Quant che finalmentri a si rivave in glesie e si diseve qualchi prejere, a si sintavin ta un banc, tal cidín e tal fresc, e tal cuiét.... A ere come une rincompense pal sacrifici ca si veve fàt a rivá fin la! Dope sedi confessaz e dopo le mese, e fate le comunion, si leve tal "refletori" a mangja ce che si veve partat.
            Qualchi d'un al mangiave polente e formadi, un altri al mangiave polente e fricis, e chei ca stevin plui ben a mangiavin polente e polez! El rest da zornade a ere dedicade a la a viodi duç i quadris da glesie, e le, buteghe dai ricordos, par comprá si e no qualchi madajute cu le Madone par fale dopo benedí dai Fraris, e mandá une cartuline a me pari ca l'ere in Svizzare!
            Le gnót, i fortunaz a le passavin tal dormitori public, a durmi su li brandis, e che altris a durmivin tal refletori la ca si mangiave! Cui al durmive su li bancjs. Altris a durmivin su li taulis ...E altris scrufuliz par tiare, sul paviment di piere! I omps zovins a levin a durmi pai cjamps ta medis dal fèn ca avevin tajat i contadins locai.
             Tal domàn dopo sedi lavaz le mûse ta lage da fontane e cjapade messe a si tornave a Cjararie planc plancûz cirínt qualchi nole strade fasint!
            A si partive cul cjar di Cjararie quant cal scomenzave a la iú el soreli viars cinc e mieze sis, dúc contenz e raccontansi li storis da zornade pasade.
            A si rientrave a Cjasteons tal domàn durant le gnôt viars le une e mieze dos, dopo mieze gnôt... Mi ricuardi che quant ca si entrave tal pais, i paesans a jevavin e a viargevin i scurs dai barcòns da cjamaris par vigni a viodi, e par vigni a saluda e a sinti i pellegrins di Madone di mont ca cjantavin: MADONNA DI CASTELMONTE PREGATE GESÚ PER NOI !
            WALTER CHEL DI CIBISCHIN - Scrite el 28 di Lui 1996.
                                        "Taponà el passât a le rinunciá a lis tie radis.!’