All'incontro coordinato da giornalista Silvano Bertossi,
sono intervenuti:

Pietro Fontanini, presidente della Provincia di Udine;
Luigi Geromet, presidente dell'Istituto "Achille Tellini" di Manzano;
Fausto Zof, curatore del libro;
Roberto Iacovissi, relatore;
Giovanni Maria Basso, autore del libro.

Letture di
Novella Del Fabbro, Valentino Morellato e Doris D'Antoni

Te flùima de vita
(ROBERTO IACOVISSI – La Vita Cattolica del 5 Gennaio 2012) 

Passe cuatricent poesiis di Giovanni Maria Basso tune gnove antologie. Al è sempliç e complès adun, il mont poetic di Basso, e ce di miôr de poesie par pandi une aventure umane cetant siore di afiets, storiis, personaçs, gjonde e marum, preiere e maluserie 

          SE AL È VÊR che al è il viers poetic a dâ forme al mont, e che al è il viers la sô nominazion plui autentiche e inceose, po ben, chest al volarà significâ, di conseguence, che la poesie, cemût che e je stade necessarie par agnorums, lu è ancjemò ore presint e lu sarà di sigûr pal avignî. Al è indiscutibil che te babêl semantiche de cuotidianitât moderne, chel de poesie al sedi un lengaç par prominence, un lengaç che al palese la sô proprie e insostituibil specificitât tra i struments che o doprìn par metisi  in relazion, par comunicâ cun chei altris. Cussì che la poesie, plui di altris formis di espression artistiche, e je in grât di tignî di cont e di dâ vôs ae nestre, e personalissime, esperienze di lenghe, parcè che no avodade ae utilitât dal contingjent, al usaç imediât dal «hic et nunc» cuotidian, ma po ben a dut l’arc che al va de memorie dal passât al sium di un avignî.
          Cun dut chest, la lenghe de poesie e je une lenghe ambigue, no dome semantichementri: e je un microcosmi che si adate a milante impensabilis interpretazions, a profonditâts di dâ inzirli, a espandisi al infinît o a une implosion su se stes, dut chest vivint ancje il parados antîc che i permet di pandi il pinsîr plui alt e solen e lis vibrazions plui profondis dal spirt, sedi pûr restant dome labile olme di un segn, svoladi cesel su la pagjine blancje di un sfuei. Di un tant e je buine la poesie, cuant che e je poesie vere, di rivâ parfin a lâ oltri dut chest, a jessi fûr dal strent significât de peraule scrite, par rivocâ ben di plui dal so referent reâl e realizant, ta chest mût, un cjalâ particolâr sui oms e sul mont, un cjalâ che al è dome chel, ugnul, de sô lenghe, e chel di nissune altre lenghe dal mont.
          E cheste e je la lenghe de poesie di Zuan Marie Basso, la lenghe che o cjatìn ad implen te antologjie des sôs poesiis, a pene editade, «Te flùima de vita», curade di Fausto Zof pal meritori editôr dal Istitût «Tellini» di Manzan, che e conten passe cuatricent poesiis, scritis intun arc di timp che al va dal 1975 al 2005.
          Al è sempliç e complès adun, il mont poetic di Basso; e ce di miôr de poesie par pandi une aventure umane cetant siore di afiets, sintiments, storiis, personaçs, gjonde e marum, preiere e maluserie; ce miôr di chest spieli che, cun dut che al sedi ugnul, al rive a pandi milante robis, milante musis di une esistence che si plee su di lui e che lui al rimande. E antancj a son i regjistris poetics dal autôr: chel dal cisicâ, par esempli, dal cisicâ dal amôr, di un amôr contât sot vôs, cun prudence, ma che altris voltis, cambiant regjistri, al è un amôr che al ven fûr potent e fogonât, come tes «rogazions d’amôr / che e an regalât el caligo/ des fugariis de zoventût»; ma al è ancje un «cisicâ di citos», di cidin, un dai tancj ossimors che e je siore la poesie di Basso, un cisicâ che al moreste «el cundulî de gnot».
           Che no si crodi, dut câs, che la poesie di Basso, tal so disvelament leterari, e palesi dome regjistris di sfumaduris slassadis, parcè che il poete al sa tocjâ ancje altris tascj, come chel di une juste indignazion che, però, e sielç la monture di une «pietas»  dolorose e cence rivoc, o chel di un marum stiçât par no jessi stât bon di rispuindi a ce che i domandavin cûr e cuarp.
          Sintiment fuarts a son, chei dal poete, di cjar e di spirt, ma simpri vivûts cu la cussience de dibisugne di fâ cont cuntune umanitât che se e cole, e pues tornâ a resurî, baste che e alci i voi al cîl, magari cu la man che e trime cuant che «impiâ una cjandela / cu la scleta sperança / che chê flamuta / mi judi a brusâ / dutis li’ mês carognadis», ancje parcè che al sa che se lui al à dibisugne dal jutori de Madone par «intopâ la lûs de pâs», al sa ancje che se ducj i oms a àn dibisugne dal perdon, tant che «il Signôr lui al sa pulît / che no ducj o sin / flôr di fâ particulis», ma che «e je ancja vera / che sin duta farina dal to sanc / Signôr». Tra lis racueltis presintis ta cheste antologjie, di sigûr «Int nestra» e merete, pe sô completece e riesside poetiche e contenutistiche, un puest a part. Culì, il poete al proferìs litrats lizêrs sul fîl di une memorie che e scrusigne oms e feminis dal so paîs, stant simpri atent ae misure, a no colâ tal colôr o tai stereotips che e je plene cierte letterature in lenghe.
          Provait a lei di Otavio, che al scuen tignî «l’aga in bocja», e che al «gloteva macarons»; da Gjelinde de vuere, che la vite i veve parturît dome disgraziis, e nono Ferdinando che, biât om, «el scrupulava a lunc / su la anada dal contadin».
          Vint di fevelâ dal so mont, dal so orizont particolâr, vint di rapresentâ la sô liende autobiografiche in chel di origjinâl, di incompatibil cun altris liendis, che ancje linguistichementri il poete al possêt, lui al scuen meti da bande la coinè par voltâsi ae sô proprie fevelade, a chê de perifarie che al è a stâ.
          E je, cemût che o vin za dit, la sielte de perifarie linguistiche, un fenomen gjenerâl de poesie dialetâl di chescj ultins agns. Tirantsi vie de coinè stabilide, ancje la lenghe di Basso si cjate denant dal univiers fruçonât de oralitât, al infinît disferenceament des varietâts che a puartin ae moltiplicazion cence fin des realizazions e invenzions linguistichis: in curt, al «idioletto», scuasit une gnove, personâl lenghe poetiche. Cun cheste sô lenghe particolâr Basso nus conte la sô aventure umane te «flùima de vite», di chê aventure – umane e poetiche – che tant i à dât.  

TE FLÙIMA DE VITA
POESIIS,  di Giovanni Maria Basso, Istitût «Achille Tellini», Manzan 2011, pp. 424

Palazzo Antonini in Udine,  12 Dicembre 2011
 
Presentazione del libro di poesie
Te fluìma de vita
(Nella fiumana della vita)
di Giovanni Maria Basso